Явган аялал

Уул хадаар аялахад хамгийн тохиромжтой гутал бол гүйлтийн пүүз юм. Харин уулын гутал сайн гэдэг нь реклам төдий. Уулын гутал нь маш хүнд, дээрээс нь агаар нэвтрүүлдэггүй. Ус нэвтэрдэггүй гэж рекламддаг. Тэр нь харин ч муу. Хэрвээ ус нэвтрэхгүй юм бол таны хөл амьсгалахгүй гэсэн үг. Хөл чинь амьсгалахгүй бол чийг татна. Түүнчлэн тэр том банхар гутал нэг норчих юм бол мөд хатахгүй. Хөл хэдий чинээ хүнд та төдий чинээ цуцах болно. Уулын гутлыг шагайг хөдөлгөлгүй барьдаг сайн талтай гэж ярьдаг. Энэ нь буруу ойлголт. Таны шагай чөлөөтэй хөдөлж байх ёстой. Шагай хөдлөхгүй байх юм бол таны хөлний гэмтэх магадлал улам ч өснө. Зэлүүд ойд шагайгаа мултална гэдэг хүсэх зүйл биш. Тэгэхээр ууланд явахад агаар нэвтрүүлдэг, түрийгүй, хөнгөн, хурдан хатдаг пүүзийг сонгох хэрэгтэй.